Shkruan: Shefqet Jashari-STROFCI
Edhe pse është e njohur veprimtaria kriminele e SHIK-ut të LPK- PDK-së nga faktori ndërkombëtar dhe ai i vendit, edhe pse njihet babai i kësaj krijese të shëmtuar, edhe pse njihen kryekriminelët e kësaj qendre të krimit të organizuar me emra dhe mbiemra, që dhanë urdhra për të bërë krime të llojllojshme, drejtësia e Kosovës dhe ajo ndërkombëtare nuk po bëjnë asgjë të rëndësishme për ta kryer detyrën që ua kanë besuar institucionet e vendit dhe ato ndërkombëtare për ta luftuar krimin e organizuar, që aq shumë e ka shëmtuar Kosovën, që aq shumë i kanë njollosur shqiptarët si popull dhe si komb.
Siç dihet, menjëherë pas luftës, SHIK-u i PDK-së vriste në pikë të ditës, me maska e pa maska, veprimtarë të shquar të Kosovës dhe të LDK-së, ndërsa shqiptarët e gjorë që i kishin parë dorasit, nuk guxonin të jepnin informata dhe as të dëshmonin për dorasit, pasi që argatët e babait të SHIK-ut e ringjallën sistemin e UDB-së së Beogradit. Këto krime zgjatën deri sa i likuiduan të gjithë kundërshtarët e tyre politikë, për të mos u brengosure se pushtetin e kanë në rrezik për ta humbur.
Policia e UNMIK-ut burgoste persona të dyshuar që kishin bërë krime të luftës, por opinioni ynë nuk e përkrahte burgosjen e tyre për të bërë hetime, me faktin se ata gjatë luftës, apo pasi përfundoi lufta, ishin dukur në opinion të veshur me uniformën e UÇK-së, apo ishin vetëgraduar me grada ushtarake, për t’u përgatitur për ta rrjepur Kosovën. Pra, uniforma ishte alibi për RTK-në, gazetat e kontrolluara nga PDK-ja, gazetarë sahanlëpirës dhe analistët kakuda, që të gjithë së bashku (siç veprojnë bretkosat në moçale), kërkonin nga ‘’përkrahësit’’ e UÇK-së t’i bllokonin rrugët e Prishtinës dhe të qyteteve tjera të Kosovës, për të kërkuar lirimin e ‘’çlirimtarëve’’. Nga kjo situatë e tendosur që krijohej nëpër rrugët dhe qendrat e qyteteve të Kosovës, veçmas në Prishtinë, për t’i përkrahur ‘’çlirimtarët’’ e dyshuar për krime të luftës, apo për krime tjera, UNMIK-u zgjodhi të keqen më të vogël për ta. Ua la shqiptarëve të lirë dorasit e vrasjeve politike, dhe as që i gjurmoi urdhëruesit e atyre vrasjeve, për të pasur siguri dhe qetësi për jetën e tyre personale. Pra, nuk e ‘’futën therrën në këmbë’’ për një popull që nuk donte të sundonte ligji i shtetit ligjor, por e donte sundimin e xhunglës.
Fatkeqësisht, e njëjta gjë po përsëritet edhe sot, kur Policia e EULEX-it burgos persona në bazë të fakteve të organeve përgjegjëse, për krime politike apo krime ekonomike, mjetet e opinionit publik të kontrolluara dhe të korruptuara nga pushtetarë, së bashku me gazetarë sahanlëpirës dhe analistë kakuda, kundërshtojnë burgosjen e tyre, ndërsa qeveritarët nëpërmjet mekanizmave të ndryshëm shtetërorë, bllokojnë dhe pengojnë zhvillimin e hetimeve.
Edhe avokatët shpirtshitur – kriminelë, në bashkëpunim me gardianë – robotë të burgjeve, që nuk kanë as erë njerëzie, po e pengojnë zhvillimin e hetimeve, për t’i bërë të pa vlefshme faktet, duke ua mundësuar të dyshuarve që janë në hetime të komunikojnë në mes tyre për t’i pëlqyer fjalët, me qëllim që t’i bëjnë të pavlefshme faktet që janë kundër tyre. E vetmja gjë që sot ndryshon nga epoka e UNMIK-ut, është se përkrahja e ‘’përkrahësve’’ të UÇK-së mungon. Rrugët dhe qendrat e qyteteve janë të qeta, nga se tani manipulimeve iu ka kaluar koha, sepse edhe ‘’zogjtë e malit’’ e kanë kuptuar se kush punoi për Kosovën dhe kush punoi për grazhdin e tij. Sot është e qartë si drita e diellit se Kosova e gjorë, menjëherë pas luftës me të madhe u rrjep dhe po rrjepet me mija herë më tepër nga bajraktarët e farës ruse, pehlivanët e Nanosit dhe ‘’pionierët e Enverit’’ ( plangprishësit e Kosovës) se në kohen kur atë e sundonin kukullat e Beogradit, që nga epoka e Ali Shukriut e deri te epoka e Azem Vllasit.
Se institucionet shtetërore të Republikës së Kosovës dhe opinioni i gjerë (gazetat dhe televizionet e kontrolluara nga Qeveria e Xhavit Halitit), nuk po e përkrahin EULEX-in në detyrën që iu ka besuar, dëshmojnë këto fakte:
a) Rasti i ndërgjegjësimit të ushtarit të UÇK-së, Nazim Bllaca. Ky rast në vend se të trajtohet drejt e mirë nga mjetet e opinionit publik, duke e përgëzuar Nazim Bllacën për guximin qytetarë, që po e thotë të vërteten e hidhur për veti, kolegët dhe eprorët e tij, të cilët gjatë luftës dhe pas luftës ishin manipuluar nga themeluesit e SHIK-ut të LPK – PDK-së, të cilit iu kishin dhënë detyra për përgatitjen e atentateve ndaj personave dhe personaliteteve të caktuar të LDK-së, apo të subjekteve tjera të Kosovës.
Opinioni ynë është dashur ta shfrytëzojnë rastin Bllaca dhe ta bëjnë aktuale zbulimin e dorasëve dhe urdhëruesve të krimeve politike që u bënë gjatë luftës dhe pas luftës. Atë punë nuk e kryen mjetet e opinionit publik, sepse shumica prej tyre kontrollohen prej Qeverive të Xhavit Halitit, që e shëmtuan Kosovën dhe qytetarët e saj në mënyrën më të pamëshirshme.
b) Rasti i ndërgjegjësimit të zotëri Agim Hotit, i cili ka kuptuar se ka qenë i manipuluar nga babai i SHIK-ut, Xhavit Haliti, dhe argatët e tij: Artan Nimani e Agron Hajradinaj, të cilët e kanë urdhëruar t’i bëjë dy atentate ndaj Kryetarit të parë të Republikës së Kosovës dr. Ibrahim Rugova. Institucionet kompetente të Kosovës dhe të EULEX-it, po e shuajnë këtë rast. Kjo tregon se SHIK-u ende vepron në Kosovë dhe se nuk është aspak e vërtetë se ai e ka shuar veprimtarinë e tij kriminale.
Pse nuk flet Jakup Krasniqi dhe Hashim Thaçi për këto raste, duke kërkuar nga organet kompetente të bëhen hetime për dy atentatet e lartpërmendura, nuk është për tu habitur, ngase është në pyetje Xhavit Haliti, ai i cili si njërin, si tjetrin, i ‘’rriti’’ në pyka dhe i bëri faktorë që t’iu ‘’shkoj fjala’’. Pra, këta dy jarana të Xhavitit nuk duhet t’i mundojmë duke kërkuar prej tyre ta prishin jaraninë dhe besën që ia kanë dhënë Xhavitit. Neve na bën të habitemi me Kryetaren e Kosovës, zonjën Jahjaga, e cila ‘’i ka shti veshët në lesh’’ dhe nuk po bëzan fare për këto raste. Me siguri ka të dhëna se SHIK-u ende punon, prandaj edhe frikohet, apo do ta kullotë edhe ajo Kosovën siç e kullotën dhe po e kullosin plangprishësit e Kosovës, së bashku me argatët e tyre pseudointelektualë, që u bënë dekor në qeverisjet e Xhavit Halitit dhe kukullave të tij Hashim Thaçit, Kadri Veselit, Azem Sylës, Bajram Rexhepit etj.
Është më se e sigurt se EULEX-i ka të dhëna të mjaftueshme për veprimtarinë kriminele të personave që e krijuan, udhëhoqën dhe ende po e udhëheqin SHIK-un, këtë qendër komanduese të krimit të organizuar në Kosovë. Pse nuk po marrin masat e duhura prokurorët e EULEX-it, që këtë qendër të krimit të organizuar ta shkatërrojnë, është më se e qartë. Si ta luftojnë SHIK-un kur ai është bërë shtet mbi shtet! Babai i tij, Xhavit Haliti, si babaxhan e ka zapuar Kuvendin e Kosovës. Piunit të tij më të besueshëm, Hashim Thaçit, ia ka dorëzuar dizginat e Qeverisë, për ta bërë zap Kosovën, duke i futur kuadrot e larta të SHIK-ut në të gjitha institucionet shtetërore dhe jo shtetërore të saj. Ndërsa lidershipi i saj po përkrahet nga qendrat e vendosjes ndërkombëtare, se fjalët, ’’jo’’, ’’nuk bën’’, ’’nuk ka mundësi’’ i kanë harruar kaherë. Gjuha nuk ua thotë, prandaj po i përkëdhelin dhe po i lavdërojnë, se me ta shumë lehtë po kanë të bëjnë eksperimente të llojllojshme me Kosovën e me shqiptarë, taman ashtu siç bëjnë mjekët eksperimente me mijtë e bardhë eksperimentalë.
Edhe pasurinë e Kosovës të cilën qytetarët e saj me djersë e gjak e krijuan, i përvetësuan pehlivanët e nanosit, bajraktarët e farës ruse dhe pionierët e Enverit në forma dhe mënyra të ndryshme. Edhe kjo që ka mbetur, së shpejti do të përvetësohet prej tyre dhe pastaj edhe nëse e lëshojnë pushtetin formalisht me vetëdëshirë, se askush nuk mund t’ua marrë, ata prapë me pasurinë që e kanë grumbulluar, (e pakta që dihet, dhe e shumta që nuk dihet) do ta sundojnë Kosovën pa u lodhur, nga se argatët e tyre, SHIK-istat, që janë futur në institucionet shtetërore dhe në subjektet politike opozitare të Kosovës, për të luajtur rolin e ‘’kalit të Trojës’’, do të dirigjohen prej tyre, për t’i shkatërruar nga brenda kundërshtarët e tyre politikë. Siç po shihet pasuri e përvetësuar e Kosovës po luan rol me rëndësi për tu bërë hajnat dhe kriminelët e Kosovës të paprekshëm nga organet e drejtësisë. A nuk dëshmon kjo se parja i qel të gjitha rrugët e suksesit, por edhe të faqeve të zeza dhe turpit?!
Duke i marrë parasysh të gjitha këto fakte, EULEX-i nuk e ka të lehtë t’i ‘’gjuhet në shpinë’’ mbretit të mafisë së Kosovës, sepse ai është babai i SHIK-ut, pronar i PDK-së, kryeqeveritar i Kosovës, edhe pse kumonat ia ka vënë në qafë Hashimit, ‘’çobani’’ i tij është Xhaviti, i cili gjithë këtë fuqi e ka arritur në saje të veprimtarisë kriminale të SHIK-ut të tij dhe përkrahjes pa rezervë të Fatos Nanos dhe Sigurimit të Enver Hoxhës, që ishte Degë e OZN-UDB-së së Beogradit.
Por, EULEX-i duhet ta ketë të qartë se pa burgosjen e kriminelëve që e krijuan dhe e komanduan SHIK-un, për të dhënë llogari për krimet e bëra, nuk kanë kurrfarë mundësie ta luftojnë krimin e organizuar dhe as të krijojnë shtet ligjor. Në Kosovë edhe më tutje do të sundojë ligji i xhunglës, ligji i të fortit, ligji i kriminelëve, hajnave dhe mafiozëve. Pra, Kosova me SHIK-un e pa shkatërruar do të bëhet qendra e krimit të organizuar për tërë Evropën. Ndërsa Kosova edhe më tutje do të jetë utrinë katundi për ta kullotur thiu e i biri thiut, qytetarët e saj (një pjesë prej tyre) edhe më tutje do të jenë robotë të plangprishësve të Kosovës, ndërsa shumica e popullsisë do të përmeqatet për të siguruar ekzistencën fizike me mund dhe sakrifica të mëdha.
Botuar në Bota Sot më 19.12.2012
